Kina ka nisur një operacion masiv evakuimi për 400 mijë persona, ndërsa supertajfuni Ragasa po afrohet me brigjet juglindore të vendit, pasi më herët goditi Filipinet dhe Tajvanin me erëra shkatërruese deri në 214 km/orë.

Mijëra banorë janë larguar tashmë nga shtëpitë dhe shkollat në Filipine dhe Tajvan, ndërsa autoritetet kineze paralajmërojnë masa të reja emergjente. Vetëm në provincën Cagayan, mbi 8,200 persona u evakuuan, ndërsa 1,220 të tjerë u strehuan në qendra emergjente në Apayao, zonë e njohur për rrezikun e përmbytjeve dhe rrëshqitjeve të dheut.

Në Filipine, autoritetet kanë pezulluar fluturimet vendase në provincat veriore dhe kanë ndaluar lundrimin e anijeve të peshkimit dhe trageteve ndër-ishullore për shkak të detit të trazuar. Presidenti Ferdinand Marcos pezulloi punën e institucioneve shtetërore dhe urdhëroi mbylljen e të gjitha shkollave në zonat e prekura.

Në Tajvan, qeveria urdhëroi mbylljen e disa zonave bregdetare dhe malore në jug të vendit, si dhe në ishujt Orchid dhe Green. Aeroporti i Shenzhen-it në Kinë njoftoi se do të ndalojë fluturimet që nga nata e së martës, ndërkohë që në provincën Fujian janë pezulluar 50 linja tragetesh.

Agjencia meteorologjike e Filipineve paralajmëroi për një rrezik të lartë stuhie kërcënuese për jetën, me dallgë që mund të tejkalojnë tre metra gjatë 24 orëve të ardhshme në zonat bregdetare të ulëta.

Supertajfuni Ragasa pritet të jetë një nga stuhitë më të fuqishme që ka goditur rajonin vitet e fundit, duke testuar kapacitetet e emergjencave në tre shtete njëherësh.