Tiranë – Deputetja e Partisë Demokratike, Jorida Tabaku, ka reaguar ashpër pas deklaratave të kryeministrit Edi Rama në mbledhjen e Grupit Parlamentar të PS, ku ai tha se do të presë raportin e Këshillit të Mandateve para se të flasë për imunitetin e Belinda Ballukut, për të cilën SPAK ka kërkuar arrestimin.

Përmes një postimi në rrjetet sociale, Tabaku akuzoi qeverinë se po rrezikon integrimin europian të vendit, duke refuzuar të zbatojë ligjin dhe drejtësinë. Deputetja e opozitës theksoi se modeli aktual i qeverisjes vendos interesin personal mbi atë kombëtar, duke e çuar Shqipërinë në një udhëkryq historik.

“Ky udhëkryq nuk është zgjedhje jonë, por një pengesë e imponuar nga një model qeverisjeje që vendos interesin personal mbi interesin kombëtar,” shkroi Tabaku, duke nënvizuar rrezikun e korrupsionit të institucionalizuar dhe përqendrimit të pushtetit në një dorë të vetme.

Deputetja bëri thirrje për një përgjigje qytetare dhe paralajmëroi një tubim për të shtunën në orën 18:00 përballë Kryeministrisë, ku qytetarët do të kenë mundësinë të shprehin qëndrimin e tyre mbi këtë çështje.