Grupi i njohur britanik i muzikës pop, “Take That”, ka njoftuar se do të rikthehet në skenë me një turne madhështor në Mbretërinë e Bashkuar dhe Irlandë në vitin 2026.

Spektakli do të titullohet “The Circus Live”, një rikthim i një prej shfaqjeve më të suksesshme të grupit, i organizuar fillimisht në vitin 2009, ku mbi një milion fansa ndoqën koncertet e tyre në arenat e mbushura plot.

“Turneu i ‘Circus’ ishte një nga përvojat tona të preferuara si grup dhe kemi folur shpesh për rikthimin e tij. Kjo kohë ka ardhur. Jemi shumë të emocionuar që do të mirëpresim audiencat e vjetra dhe të reja verën e ardhshme”, deklaroi grupi.

Në këtë rikthim, “Take That” do të performojë setlistën origjinale të vitit 2009, të shoqëruar me disa surpriza për publikun. Në skenë do të ngjiten edhe “The Script”, që i shoqëruan edhe në turneun e parë, si dhe Belinda Carlisle, ish-vokalistja e grupit “Go-Go’s”.

Turneu do të nisë më 29 maj 2026 në stadiumin “St Mary’s” në Southampton, duke vazhduar në qytete të tjera si Coventry, Sunderland, Glasgow, Cardiff dhe Manchester.