Ambasadori gjerman në Shqipëri, Karl Bergner, ka nisur një tur takimesh me liderët politikë të qeverisë dhe opozitës në vend. Në këtë kuadër, ai u takua dje me Lulzim Bashën, vetëm dy ditë pasi ky i fundit humbi në gjykatë vulën e Partisë Demokratike, e cila tashmë i ka kaluar Sali Berishës.

Në njoftimin e ambasadës gjermane, theksohet se gjatë takimit u diskutuan zhvillimet e brendshme politike, vijimi i kursit të reformave të Shqipërisë në rrugën drejt Bashkimit Evropian, si dhe marrëdhëniet dypalëshe mes Gjermanisë dhe Shqipërisë. Ambasadori Bergner nënvizoi rëndësinë e madhe të një opozite demokratike për zhvillimin e vendit. Ai theksoi se pjesëmarrja paqësore dhe konstruktive në proceset parlamentare është po aq e rëndësishme sa respektimi i të drejtave të pakicave dhe ndarja e pushteteve nga të gjitha palët.

Gjithashtu, ambasadori gjerman vuri theksin në forcimin e mëtejshëm të shtetit ligjor dhe luftën kundër korrupsionit, veçanërisht nëpërmjet Prokurorisë së Posaçme SPAK, duke theksuar se këto janë thelbësore jo vetëm për anëtarësimin në BE, por edhe për një të ardhme më të mirë për të rinjtë dhe të rejat shqiptare.