Një 50-vjeçar turk është proceduar në gjendje të lirë pasi tentoi të nxirrte rreth 30 mijë euro nga Shqipëria pa i deklaruar në pikën e kalimit kufitar të Kapshticës. Gjatë kontrollit të ushtruar nga shërbimet e Policisë Kufitare të PKK Kapshticë, në vijën e dytë, u gjet një çantë krahu e fshehur në kabinën e kamionit që drejtohej nga shtetasi A. D., ku ndodheshin 27,915 euro dhe 2,935 dollarë.

“PKK Kapshticë/Goditet një rast i mosdeklarimit të parave në pikën e kalimit kufitar. Për rastin u referuan materialet në Prokurori, ku nisi procedimi në gjendje të lirë për shtetasin turk A. D., 50 vjeç, banues në Stamboll.

Paratë, që nuk ishin deklaruar në kufi, u sekuestruan nga Policia në cilësinë e provës materiale. Materialet procedurale iu kaluan Prokurorisë së Shkallës së Parë të Juridiksionit të Përgjithshëm Korçë për veprime të mëtejshme, lidhur me veprën penale “Mosdeklarimi në kufi i të hollave dhe sendeve me vlerë”.