Trupi i pajetë i një 74-vjeçari është gjetur ditën e sotme në një kanal me ujë në Tiranë, pranë një kantieri në “Bulevardin e Ri”. Viktima është identifikuar si H.S.

Sipas Policisë së Tiranës, gjatë shqyrtimit paraprak nuk janë konstatuar shenja dhune. Hetimet për përcaktimin e shkakut të vdekjes dhe rrethanat e ngjarjes vazhdojnë, përfshirë ekspertizën mjeko-ligjore.

Paraprakisht dyshohet se ngjarja mund të ketë ndodhur aksidentalisht, për shkak të rënies së viktimës në kanal dhe pamundësisë për të dalë nga uji, por nuk përjashtohen edhe pistat e tjera hetimore.

Materialet procedurale i janë referuar Prokurorisë së Tiranës për veprime të mëtejshme.