Këngëtari i njohur Tiri Gjoci ka ndarë detaje për bashkëpunimin e tij me të ndjerin Dr. Flori në një intervistë me Ester Bylykun, duke shpjeguar përjetimet e tij mbi atë periudhë dhe ndikimin që pati kënga në jetën e tij.

Gjoci tha se në atë kohë ishte vetëm 18-19 vjeç dhe nuk e kuptonte plotësisht ndikimin e politikës në muzikë. Ai tregoi se kënga u prezantua si një kritikë ndaj politikës në tërësi, por më pas u përdor ndryshe nga sa e kishte menduar.

“Nuk ishte e ndarë. Edhe këngën po ta dëgjosh, nuk është se të orienton diku,” tha ai, duke theksuar se klipi ishte ai që e drejtoi mesazhin politik. Madje, ai pranoi se nuk e kishte parë klipin deri në transmetimin e tij te Arian Çani dhe e kuptoi ndikimin e tij vetëm në atë moment.

Gjoci gjithashtu përmendi se kishte mungesë sinqeriteti nga disa persona të përfshirë në projekt, veçanërisht Ermal Mamaqi, i cili e kishte prezantuar idenë ndryshe. Ai kujton se kur e pyeti Mamaqin për situatën, përgjigja e tij ishte: “Pse plak, nuk e dije ti plak?”

Pavarësisht keqkuptimeve të asaj kohe dhe situatës së vështirë që përjetoi, Gjoci sot është krenar për atë këngë, duke e konsideruar ende aktuale për realitetin politik shqiptar. “Për fat të keq, është ende e vlefshme edhe sot,” përfundoi ai.