Një ngjarje e rëndë ka tronditur qytetin Villingen-Schwenningen në Gjermani, ku një grua 45-vjeçare ka vrarë dy djemtë e saj adoleshentë dhe më pas ka kryer vetëvrasje. Tragjedia u zbulua mbrëmjen e 4 shkurtit, kur bashkëshorti i saj u kthye në shtëpi dhe gjeti trupat e pajetë të familjes së tij.

Sipas mediave gjermane, viktimat janë dy djem të mitur, 14 dhe 16 vjeç, të cilët dyshohet se janë qëlluar me thikë nga nëna e tyre. Autoritetet kanë gjetur një thikë në vendin e ngjarjes, që mendohet të jetë arma e krimit.

Ekipet e emergjencës mbërritën menjëherë në vendngjarje, por nuk mundën të bënin asgjë për të shpëtuar jetët e tyre. Departamenti i Hetimeve Penale ka nisur një hetim të plotë, duke marrë në pyetje fqinjët dhe duke siguruar prova nga mjekësia ligjore për të zbardhur rrethanat e ngjarjes tragjike.

Ndërkohë, komuniteti lokal është në shock, ndërsa motivet e kësaj tragjedie mbeten ende të paqarta.