Një ngjarje e rëndë familjare është shënuar pasditen e së hënës në Elefsinë të Greqisë, ku një grua 71-vjeçare humbi jetën pasi u përplas aksidentalisht nga automjeti që drejtohej nga vajza e saj 44-vjeçare, teksa kjo e fundit po parkonte.

Sipas mediave greke, 44-vjeçarja ishte kthyer në banesë së bashku me nënën dhe fëmijët, pasi kishte shkuar më herët në shkollë për t’i marrë. Gjatë tentativës për parkim, 71-vjeçarja zbriti nga makina për t’i dhënë udhëzime vajzës. Në atë moment, dera e pasagjerit mbeti e hapur dhe, teksa automjeti po lëvizte mbrapsht, shoferja dyshohet se shtypi aksidentalisht pedalin e gazit.

Mjeti lëvizi në mënyrë të pakontrolluar, duke zvarritur gruan e moshuar dhe duke e bllokuar mes derës së hapur të makinës dhe një peme. Ngjarja ndodhi para syve të nipërve dhe mbesave të viktimës, të cilët shpërthyen në lot.

Fqinjët, të alarmuar nga britmat, vrapuan për të ndihmuar, ndërsa 44-vjeçarja ndodhej në gjendje shoku. “Fëmijët po qanin për gjyshen e tyre”, tregoi një banor i zonës.

71-vjeçarja u transportua me ambulancën e EKAB drejt Spitalit Thriasio, ku u shpall e vdekur. Autoritetet greke kanë arrestuar 44-vjeçaren me akuzën e vrasjes nga pakujdesia, ndërsa hetimet për zbardhjen e plotë të rrethanave të aksidentit vijojnë.