Një ngjarje e rëndë ka tronditur komunitetin e Lezhës mbrëmjen e së premtes. Shtetasi Aleksandër Marku, 42 vjeç, banues në fshatin Lalm, u gjet i pajetë në dyqanin e tij me vegla pune rreth orës 19:30. Policia njofton se nga veprimet e para hetimore nuk janë konstatuar shenja dhune, dhe paraprakisht dyshohet se vdekja ka ardhur nga shkaqe natyrale.
Ndërkohë, nëna e tij, Prene Marku, 72 vjeçe, pas marrjes së lajmit për humbjen e djalit të saj dhe në gjendje të rënduar psikologjike, dyshohet se ka varur veten në banesën e tyre në fshatin Lalm i Ri, Lezhë. Trupi i saj u gjet i pajetë nga familjarët.
Të dy trupat janë dërguar në Institutin e Mjekësisë Ligjore në Tiranë për kryerjen e ekspertizës dhe përcaktimin e saktë të shkaqeve të vdekjes. Ngjarja ka tronditur rëndë familjarët dhe komunitetin lokal, duke nxjerrë në pah pasojat dramatike që mund të ketë humbja e një të afërmi në familje.
