Një gjykatë në Paris ka urdhëruar platformën e shitjes online Shein të zbatojë masa strikte për verifikimin e moshës për të gjitha produktet e kategorizuara si “për të rritur” të shitura në Francë. Për çdo shkelje të këtij rregulli, kompania do të gjobitet me 10,000 euro. Ky vendim vjen pas polemikave për kukullat seksuale me tipare fëminore që Shein i kishte vënë në shitje.

Gjykata hodhi poshtë kërkesën e qeverisë franceze për pezullimin e platformës për tre muaj, duke e konsideruar një masë “joproporcionale”. Ky vendim lehtëson pak presionin mbi Shein në Francë, ndërsa kompania konfirmoi angazhimin për përmirësimin e procedurave të inspektimit dhe respektimin e ligjeve dhe rregulloreve lokale.

“Prioriteti ynë mbetet mbrojtja e konsumatorëve francezë dhe sigurimi që ne i përmbahemi ligjeve dhe rregulloreve lokale,” tha një zëdhënës i Shein pas njoftimit të vendimit.

Shein ka qenë në qendër të një skandali pasi dyqani i saj online u zbulua duke shitur armë të ndaluara dhe kukulla seksi që ngjasonin me fëmijët. Qeveria franceze tentoi pa sukses pezullimin e operacioneve të kompanisë më 5 nëntor, menjëherë pas hapjes së dyqanit të saj të parë fizik në Paris.

Në përgjigje të kritikave, Shein pezulloi tregun e saj online për produktet e palëve të treta, ndërsa faqja e saj e internetit për veshjet mbeti e arritshme dhe kompania ndaloi shitjen e lodrave seksuale në nivel global.