Pas afro 48 orësh kërkimesh intensive, u gjet trupi i pajetë i kapitenit të anijes turistike, Arben Anamali, 51-vjeçari që humbi jetën duke shpëtuar dy turistë izraelitë në liqenin e Shkodrës. Operacioni i kërkimit, i cili vijoi pa ndërprerje për tri ditë, u intensifikua në orët e para të mëngjesit dhe rreth orës 05:00 trupi u lokalizua dhe u nxor nga uji.

Ngjarja e rëndë ndodhi kur dy turistët izraelitë, pjesë e një turi liqenor, vendosën të notonin, por u përfshinë nga rrymat e forta dhe rrezikuan të mbyteshin. Kapiteni Anamali, duke parë rrezikun, u hodh në ujë pa hezitim dhe arriti t’i shpëtojë duke i çuar përsëri pranë varkës, por për fat tragjik ai vetë nuk mundi të arrijë në breg.

Sipas të dhënave paraprake, mbytja e tij dyshohet të ketë ardhur si pasojë e komplikacioneve shëndetësore të shkaktuara nga lodhja ekstreme gjatë shpëtimit heroik.

Arben Anamali ishte baba i dy fëmijëve të mitur dhe prej një viti punonte si kapiten i anijeve turistike në liqenin e Shkodrës, duke qenë pjesë e një linje në pronësi të Bashkisë. Humbja e tij është një tronditje e thellë për komunitetin lokal dhe familjen, të cilët sot nderojnë kujtimin e një njeriu me guxim dhe përkushtim.