Bota e artit është në zi. Aktori i njohur kinez, Alan “Yu” Menglong, ka humbur jetën tragjikisht në moshën 37-vjeçare, pasi u rrëzua nga pallati ku banonte në lagjen Chaoyang të Pekinit.

Lajmi u bë i ditur nga mediat aziatike dhe u konfirmua nga menaxhmenti i artistit. “Me një hidhërim të padurueshëm, njoftojmë se Menglong ynë i dashur vdiq më 11 shtator. Policia ka përjashtuar çdo kriminalitet. Shpresojmë që ai të prehet në paqe dhe të dashurit e tij të mbeten të fortë”, thuhet në deklaratën e publikuar në rrjetin social Weibo.

Menglong, i njohur për publikun ndërkombëtar sidomos për rolin në serialin e Netflix “Eternal Love”, u bë fillimisht i famshëm në vitin 2013, pas pjesëmarrjes në spektaklin muzikor “Super Boy”. Më pas ai luajti në projekte të njohura si The Legend of the White Snake, Go Princess Go, The Moon Brightens You, ndërsa shfaqja e tij e fundit ishte në serialin e vitit 2025, “Feud”.

Policia ka konfirmuar se ngjarja nuk lidhet me motive kriminale, ndërkohë që rrethanat e rrëzimit mbeten të paqarta.