Flutura dhe Bashkim Basha u bënë viktima të një atentati të rëndë, që ndodhi në mes të ditës në qytetin e Shkodrës. Flutura, një nënë e përkushtuar e tre fëmijëve, humbi jetën në vend, ndërsa bashkëshorti i saj, Bashkimi, po lufton për jetën në spitalin e Shkodrës. Çifti po udhëtonte i qetë me motor, teksa papritur u përplasën nga një makinë me të cilën udhëtonin Hamza Lika dhe Arlind Bushati, të cilët ishin objektivi i atentatorëve që qëlluan me armë automatike.

E ndjera Flutura ishte kushërirë e një prej eksponentëve të Partisë Socialiste në Shkodër, Luan Harusha. Vetëm tre muaj më parë ajo kishte nisur punë në Institutin e Shëndetit Publik të Shkodrës dhe për të, dita e djeshme pritej të ishte një ditë e zakonshme pune, por fatkeqësisht nuk ndodhi ashtu.

Çifti po kthehej në shtëpi, pa e ditur që jeta e tyre do të ndryshonte papritur. Ngjarja e rëndë ka tronditur komunitetin dhe familjen e tyre, duke lënë pas një tragjedi të pashlyeshme. 66-vjeçarja humbi jetën në vend, ndërsa Bashkim Basha vazhdon të jetë në gjendje kritike për jetën. Ata ishin të pafajshëm dhe u gjendën në mes të një ngjarjeje të dhunshme pa asnjë lidhje me të.