Aeroporti Ndërkombëtar i Tiranës (TIA) ka zyrtarizuar nisjen e dy linjave të reja direkte të operuara nga kompania ajrore Transavia: Nantes–Tiranë dhe Bordeaux–Tiranë. Këto destinacione sezonale pritet të sjellin një impuls të rëndësishëm për turizmin, duke rritur lidhjet mes Shqipërisë dhe tregut francez.

Ceremonia inauguruese u mbajt sot në ambientet e TIA-s, ku mbërriti fluturimi i parë nga Nantes, i cili përfaqëson simbolikisht edhe nisjen zyrtare të të dyja linjave.

Në një deklaratë për mediat, përfaqësues të aeroportit theksuan se ky zgjerim i rrjetit të fluturimeve është një hap tjetër në forcimin e partneritetit mes TIA-s dhe Transavia-s, dhe një mundësi e re për rritjen e numrit të turistëve francezë që vizitojnë vendin tonë.

Linjat Nantes–Tiranë dhe Bordeaux–Tiranë do të operojnë gjatë sezonit veror, duke u kthyer në ura të rëndësishme lidhjeje mes Francës perëndimore dhe Shqipërisë.