Presidenti i SHBA-së, Donald Trump, ka dërguar një paralajmërim të fortë ndaj grupit Hamas, duke theksuar se do të shkatërrohet nëse nuk i përmbahet marrëveshjes së armëpushimit me Izraelin.

Komentet u bënë gjatë një konference për shtyp në Shtëpinë e Bardhë, ku Trump ishte përkrah kryeministrit australian, Anthony Albanese. Duke marrë anën e Izraelit, Trump deklaroi:
“Kemi një situatë të vogël, relativisht, me Hamasin, e cila do të zgjidhet shumë shpejt, nëse ata nuk e rregullojnë vetë, sepse po shkelin marrëveshjen.”

Ai shtoi se SHBA nuk do të ndërhynin me trupat e tyre në terren, duke sugjeruar se kombe të tjera, përfshirë Izraelin, do të ndërmerrnin veprime ushtarake. “Ata Hamasi duhet të jenë të mirë, dhe nëse nuk janë të mirë, do të zhduken”, tha Trump.

Megjithatë, presidenti amerikan shtoi një notë optimizmi:
“Do t’i japim [marrëveshjes së armëpushimit] pak shans dhe shpresojmë se do të ketë pak më pak dhunë.”

Trump gjithashtu theksoi se sulmet e SHBA-së ndaj objekteve bërthamore iraniane më herët këtë vit kishin hapur rrugën për marrëveshjen e armëpushimit, duke pohuar se “e hapi plotësisht Lindjen e Mesme.”