Turqia po përjeton ditë të zeza pas dy aksidenteve të njëpasnjëshme ajrore. Vetëm dy ditë pas rrëzimit të avionit ushtarak në kufirin Gjeorgji–Azerbajxhan, ku humbën jetën 20 pjesëtarë të Forcave Ajrore Turke, një tjetër incident tragjik është regjistruar këtë të shtunë.

Një avion zjarrfikës i tipit AT802, në pronësi të autoriteteve turke, është rrëzuar në territorin e Kroacisë. Lajmi u konfirmua nga Ministri turk i Bujqësisë dhe Pylltarisë, Ibrahim Yumakli, i cili bëri të ditur se rrënojat e mjetit fluturues janë gjetur pranë qytetit Senj, në Kroaci.

Sipas autoriteteve, piloti ka humbur jetën, duke e thelluar edhe më tej tragjedinë për institucionet dhe popullin turk.

“Shpreh ngushëllimet dhe lutjet e mia për familjen dhe të afërmit e pilotit tonë që humbi jetën në këtë aksident tragjik. Ngushëllimet e mia shkojnë gjithashtu për organizatën tonë pyjore dhe popullin tonë,” deklaroi Ministri Yumakli, sipas medias turke Hurriyet.

Mediat në Turqi raportuan se në zonën ku u rrëzua avioni është parë një “mjet fluturues që digjej”, duke sugjeruar se mjeti mund të ketë marrë flakë para se të përplasej.

Ngjarja ndodh pikërisht në ditën kur në Turqi po riatdhesohen trupat e 20 viktimave të aksidentit të avionit ushtarak C-130, duke e bërë këtë javë një nga më të errëtat për aviacionin turk.