Një ngjarje e rëndë ka tronditur mbrëmjen e sotme qytetin e Elbasanit, ku rreth orës 19:00 u gjet trupi i pajetë i një gruaje në ujërat e lumit Shkumbin. Banorët e zonës kanë njoftuar menjëherë policinë, pasi panë trupin që lundronte në lumë.

Forcat e rendit dhe zjarrfikësit mbërritën në vendngjarje, ndërsa u kërkua edhe ndërhyrja e palombarëve. Për shkak të errësirës, palombarët nuk mundën të futeshin në ujë, por operacioni u krye nga 7 efektivë zjarrfikës dhe 10 policë, të cilët arritën të nxjerrin trupin nga lumi.

Viktima është një grua rreth 40 vjeçe, ende e paidentifikuar. Sipas të dhënave paraprake, dyshohet se mund të ketë vuajtur nga probleme të shëndetit mendor.

Policia po vijon hetimet për identifikimin e viktimës dhe sqarimin e rrethanave të kësaj ngjarjeje tragjike.