Ditën e djeshme, policia ka arrestuar në Nikël Marklen Haka, një të shumëkërkuar nga drejtësia. Bashkë me Hakën janë arrestuar edhe 4 persona të tjerë, përfshirë Klajdi Hakën, i afërm i Marklen Hakës, i cili dyshohet se ndihmoi të shumëkërkuarin të fshihej në banesën e tij në Liqenin e Bacungut.
Klajdi Haka, 21 vjeç, është ndaluar për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Përkrahja e autorit të krimit”. Gjatë kontrollit në banesën e tij, ku u gjet dhe Marklen Haka, policia sekuestruar një armë zjarri pistoletë.
‘Në vijim të operacionit policor të koduar “Liqeni i Bacungut”, të dhënë ditën e djeshme, u arrestua shtetasi K. H., 21 vjeç, banues në Zezë, Nikël, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Përkrahja e autorit të krimit”, parashikuar nga nenet 278/4 dhe 302 të Kodit Penal.
Gjatë kontrollit të banesës së shtetasit K. H., (banesa ku fshihej shtetasi M. H., alias M. A.) është gjetur dhe sekuestruar, në cilësinë e provës materiale, një armë zjarri pistoletë.’, njofton policia.
Ka qenë ora 14:00 e ditës së djeshme kur RENEA hyri në banesën ku fshihej Marklen Haka në afërsi të Liqenit të Bacungut, Nikël, Krujë. Për 4 ditë (nga data 2 shtator) Haka është mbajtur nën vëzhgim deri në momentin kur dhe është vendosur për të ndërhyrë duke bastisur banesën dhe duke e kapur 33 vjeçarin papritur, zbathur, me bluzë të bardhë e pantallona të shkurtra. Në momentet kur RENEA ka ndëhyrë, Haka ka tentuar të arratiset por është ndaluar nga forcat e policisë, ndërsa në banesë iu gjet edhe një armë zjarri.
Marklen Haka ishte shpallur në kërkim ndërkombëtar më 15 Maj të këtij viti nga Gjykata e Posaçme, pas vendimit për ‘arrest me burg’ në mungesë për vrasje me paramendim e mbetur në tentativë ndaj Durim Bamit. Policia po vazhdon hetimet për zbardhjen e plotë të rastit dhe për të ndjekur përgjegjësitë ligjore të të gjithë të përfshirëve.
