Gazetari Ferdinand Dervishi ka hedhur dritë mbi detaje të reja rreth zhdukjes misterioze të ish-“mbretit” të lojërave të fatit, Ervis Martinaj, duke pohuar se policia ka kërkuar gjurmë ADN-je në vilën e familjes Avdylaj, pasi dyshohej se aty mund të ishte zhdukur.

Sipas Dervishit, emri i Aldo Avdylajt doli në skenë pas një serie informacionësh operative që çuan hetuesit drejt familjes së njohur nga Shijaku.

“Policia shkoi në vilën e Avdylajve me vonesë, 1 deri në 3 javë pas zhdukjes. Dyshimi ishte se aty mund të ishte kapur dhe zhdukur Martinaj. Skenari që përmendet është se e mashtruan me një telefonatë, duke i thënë se kishin kapur një kundërshtar të tij. Ai shkoi aty, por nuk doli më,” – deklaroi Dervishi.

Gazetari shtoi se policia shkencore ka kontrolluar çdo centimetër të ambientit, duke kërkuar gjurmë biologjike — qime, njolla gjaku apo ADN — që mund të ndihmonin në zbardhjen e rastit.

“Informacioni ishte se Martinaj është thirrur aty. Familja e di se ai është futur në grackë,” – theksoi ai.

Ndërkohë, gazetarja Klodiana Lala ka zbuluar se një personazh i njohur i botës së krimit, që dyshohet se ka dijeni të plotë për fatin e Martinajt, ka kërkuar statusin e të penduarit të drejtësisë në këmbim të dhënies së informacioneve, por SPAK nuk e ka pranuar kërkesën.

Një nga emrat e përmendur në arrestimet e fundit është pikërisht Aldo Avdylaj, por ende nuk dihet nëse ai është personi që ka kërkuar statusin apo nëse ka lidhje direkte me zhdukjen e Ervis Martinajt — një mister që prej gushtit 2022 vazhdon të mbetet pa përgjigje.