Një 27-vjeçar me inicialet A. Z., banues në Tiranë, është shpallur në kërkim nga policia pas një denoncimi të bërë nga vëllai i tij, 24-vjeçari K. Z.. Sipas raportimeve zyrtare, i riu është larguar nga një hotel në Dhërmi më 2 gusht dhe prej asaj dite nuk ka pasur më asnjë kontakt me familjen.

“Në Stacionin e Policisë Dhërmi është bërë kallëzim nga shtetasi K. Z., 24 vjeç, pasi më datë 02.08.2025, vëllai i tij është larguar nga një hotel në Dhërmi dhe nuk e ka kontaktuar më. U bë shpallja në kërkim e shtetasit A. Z., 27 vjeç, banues në Tiranë, dhe po punohet për gjetjen e tij”, njofton policia.

Prej disa ditësh, familjarët nuk kanë asnjë informacion për vendndodhjen e 27-vjeçarit, ndërsa autoritetet kanë nisur hetimet për zbardhjen e rrethanave të zhdukjes. Deri më tani nuk dihen detaje të tjera rreth arsyes së largimit apo nëse ka elementë të dyshimtë në ngjarje.

Policia u bën thirrje qytetarëve që, nëse kanë informacion për shtetasin në fjalë, të kontaktojnë menjëherë strukturat më të afërta të rendit.