Ngërçi i krijuar në Aeroportin Nënë Tereza duket se u zgjidh. Në aeroportin “Nënë Tereza” pasditen e kësaj të marte, kanë mbërritur edhe 100 mijë vaksina kineze kundër COVID-19. Ato janë pritur në aeroport nga ministrja e Shëndetësisë, Ogerta Manastirliu, ministrja e Infrastrukturës, Belinda Balluku dhe ministri i Rindërtimit, Arben Ahmetaj.

Ministrja Manastirliu ka thënë se për shkak të protestës së kontrollorëve të “Albcontrol” plani i vaksinimit është vonuar me 48-orë, por tashmë do të vijohet menjëherë me procedurat për shpërndarjen e dozave.

Ministrja e Infrastrukturës Belinda Balluku, e cila tha se nga sot fatmirësisht aeroporti është i hapur për fluturime shtetërore, diplomatike, ushtarake. Ajo shtoi se fatmirësisht me rivendosjen në funksionim të aeroportit u bë e mundur edhe mbërritja e vaksinave.

Ndërsa Ministri Arben Ahmetaj, ka shtuar se Këshilli i Ministrave, ka dhënë miratimin që në Shqipëri të mbërrijnë të hënën ose të martën e javës së ardhshme, 50 mijë doza të vaksinës ruse Sputnik V.