TIRANË – Kryetari i Komisionit të Ligjeve, Ulsi Manja, ka deklaruar sot se sistemi i burgjeve në Shqipëri është model në rajon, duke theksuar përparësitë e shërbimeve online për të burgosurit dhe trajtimin e veçantë për ish-zyrtarët e shtetit.

Në mbledhjen e Komisionit të Ligjeve dhe Administratës Publike, Manja u shpreh se aktualisht nuk ka dyqane brenda burgjeve, por të dënuarit mund të bëjnë porosi online, një sistem që sipas tij përfaqëson një “revolucion” dhe që ekziston vetëm në disa vende të tjera.

“Sigurisht ka problematika, kapen me telefona, me paligjshmëri. Por nuk ka dyqane në burgje. Ka dy vjet që në burgje operohet me sistemin online të shërbimeve që marrin të dënuarit ose të burgosurit. Ky është revolucion. Vetëm 2 ose 3 vende e kanë këtë model,” tha Manja.

Deputeti shtoi gjithashtu se zyrtarët dhe ish-zyrtarët e shtetit nuk mund të qëndrojnë në të njëjtin burg me të burgosur të zakonshëm apo eksponentë të krimit: “Patjetër burgu i Durrësit u konsiderua si vend ku mund të akomodonim të paraburgosurit që janë zyrtarë ose ish-zyrtarë të shtetit. Nuk mundet një ish-zyrtar i shtetit të qëndrojë në një burg me të burgosur të tjerë. Jo vetëm Durrësi, është edhe paraburgimi në Fier. Kjo lidhet me garantimin e integritetit fizik të ish-zyrtarëve.”

Deklaratat e Manjës vijnë ndërkohë që diskutimet mbi reformën në burgje dhe përmirësimin e kushteve të të burgosurve vazhdojnë në Kuvend.