Në një duel dominues në “Wembley”, Oleksandr Usyk konfirmoi edhe një herë statusin e tij si mbreti absolut i peshës së rëndë. Ukrainasi mposhti britanikun Daniel Dubois me nokaut teknik në raundin e pestë, duke e rrëzuar dy herë në tapet dhe detyruar gjyqtarin të ndërpresë sfidën.

Kjo është fitorja e 24-t për Usyk në po aq ndeshje, duke mbetur i pamposhtur dhe duke grumbulluar sërish të gjithë titujt botërorë të peshës së rëndë: WBC, WBO, WBA dhe IBF – titullin e fundit që ia rrëmbeu Dubois në këtë përballje.

Me një paraqitje të shkëlqyer teknike dhe fizikisht dominues, Usyk e mbajti gjithnjë kontrollin e ndeshjes, ndërsa Dubois nuk arriti të replikojë, ashtu siç kishte ndodhur edhe në përballjen e parë mes tyre dy vite më parë. Me këtë disfatë, britaniku shënon humbjen e tretë në karrierë (22 fitore), dy prej të cilave ndaj Usyk.

Stadiumi “Wembley” shpërtheu në ovacione për kampionin ukrainas, që edhe njëherë tregoi pse konsiderohet si boksieri më i kompletuar i epokës moderne.