Europa Jugore përballet me një krizë të paprecedentë nga nxehtësia ekstreme dhe zjarret pyjore, që kanë marrë jetën e të paktën tre personave dhe kanë detyruar mijëra banorë të largohen nga shtëpitë e tyre.

Shtete si Franca, Spanja, Portugalia dhe vendet e Ballkanit ndodhen në alarm të kuq për shkak të temperaturave që kanë tejkaluar 40 gradë Celsius. Në Spanjë, termometri mund të arrijë deri në 44 gradë në Seville dhe Cordoba, sipas shërbimit meteorologjik. Një person humbi jetën nga zjarri në Tres Cantos, pranë Madridit, ndërsa mbi 4 mijë vetë janë evakuar nga rajoni i Castille dhe Leon, ku mbi 30 vatra flakësh vijojnë të digjen. Një mijë ushtarë janë angazhuar për të ndihmuar zjarrfikësit në terren.

Në Portugali, zjarrfikësit luftojnë me tre vatra të mëdha, më serioza pranë Trancoso, me mbi 1,300 zjarrfikës dhe 14 avionë të angazhuar.

Italia raportoi vdekjen e një fëmije si pasojë e vapës ekstreme, me 10 qytete, përfshirë Romën, Milanon dhe Firencen, në alarm të kuq.

Greqia po përballet me mbi 150 zjarre, ku rreth 5 mijë zjarrfikës dhe dhjetëra avionë po punojnë për shuarjen e tyre. Evakuime masive kanë prekur ishujt turistikë si Zakinthos, Kefalonia dhe rajonin e Achaia Perëndimore.

Në Turqi, disa vatra u vunë nën kontroll, përfshirë në Izmit, pas evakuimeve të shumta dhe mbylljes së ngushticës së Dardaneleve dhe aeroportit të Kanakales.

Në Mal të Zi, një ushtar humbi jetën dhe një tjetër u plagos kur një cisternë uji u përmbys gjatë luftës me flakët pranë Podgoricës.

Ky fenomen ekstrem po rikujton rrezikun e madh të ndryshimeve klimatike dhe nevojën urgjente për masa mbrojtëse dhe bashkëpunim ndërkombëtar për parandalimin e tragjedive të mëtejshme.