Edhe për dy muaj të tjerë është vazhduar masa e paraburgimit ndaj tre të dyshuarve për agresionin e ndodhur në Banjskë më 24 shtator të vitit të kaluar. Të dyshuarit, V.T, B.S, dhe D.M, do të mbeten në paraburgim deri më 20 tetor 2024.

Medina Gashi, bashkëpunëtorja profesionale nga zyra e kryetares së Gjykatës Themelore në Prishtinë, konfirmoi për mediat se “Gjykata Themelore në Prishtinë – Departamenti Special ka marrë Aktvendim më datë 20.08.2024 dhe ka aprovuar kërkesën e Prokurorisë Speciale të Republikës së Kosovës, duke e vazhduar masën e paraburgimit për tre të pandehurit në një periudhë prej dy muajsh.”

Masa e paraburgimit për këta individë ishte miratuar edhe më parë, më 21 qershor të këtij viti, dhe ata janë në paraburgim që nga 26 shtatori i vitit 2023.

Ngjarja e 24 shtatorit të vitit të kaluar në Banjskë të Zveçanit përfshinte një sulm nga një grup paramilitar i udhëhequr nga Millan Radoiçiq, ku sulmi ndaj Policisë së Kosovës rezultoi me vdekjen e rreshterit Afrim Bunjaku. Policisë së Kosovës iu desh të ndërhyjë, duke vrarë tre terroristë dhe duke arrestuar disa të tjerë.