Policia ka bërë shoqërimet e para në lidhje me vdekjen e minatorit 61-vjeçar, Muharrem Plakut, i cili u gjet i pajetë mëngjesin e sotëm, pas 5 ditësh kërkimesh në minierën e Bulqizës.
Uniformat blu kanë shoqëruar në komisariat teknikun, Saba Hasani dhe inxhinierin e minierës Veli Losha. Këta të fundit priten të japin dëshminë e tyre në lidhje me ngjarjen e rëndë dhe nëse janë zbatuar të gjitha rregullat e sigurimit gjatë punës në galeri.
Tekniku dhe inxhinieri i minierës janë vënë nën hetim për të parë nëse kanë zbatuar të gjitha rregullat e sigurisë në galerinë ku PO punonte 61-vjeçari.
Plaku, mbeti i bllokuar në një nga galeritë e minierës, pasi hyrja kryesore u bllokua nga inerte të shumta.
Shkak u bë një rënia aksidentale e një masivi minerali në vendin ku ai po punonte. Trupi i tij u gjet i pajetë mëngjesin e sotëm, pas 5 ditësh kërkimesh intensive, ku rënia e inerteve e vështirësoi së tepërmi punën e ekipit të kërkim-shpëtimit.
Pavarësisht punës intensive të kolegëve dhe policisë, ishte thuajse e pamundur që rruga të zhbllokohej në kohë dhe 61-vjeçari të dilte shëndoshë e mirë nga galeria.
