Partia Socialiste ka vendosur të përgatitë fuqishëm grupin e saj të rifreskuar parlamentar, duke nisur një shkollë verore intensive për 53 deputetët që do të ulen për herë të parë në Kuvend, përfshirë edhe 9 ministra aktualë.

Duke përmbysur funksionin tradicional të Akademisë Politike si një platformë për hyrjen në politikë, këtë herë PS e kthen atë në një trajnim të detyrueshëm për figurat e reja që tashmë kanë fituar mandat. Qëllimi është qartësisht i dyfishtë: familjarizimi me procedurat legjislative dhe ndërtimi i një marrëdhënieje të qëndrueshme me elektoratin, sidomos për ata që kanë hyrë përmes listave të mbyllura.

Shkolla do të nisë më 20 qershor dhe do të zhvillohet çdo fundjavë në selinë rozë, deri në fund të korrikut. Lektori i parë do të jetë vetë kryeministri Edi Rama, ndërsa më tej përvojën e tyre do ta ndajnë Erion Braçe, Fatmir Xhafaj, Niko Peleshi, dhe figura të tjera me eksperiencë në drejtimin e grupit parlamentar dhe të Kuvendit.

Një tjetër komponent kyç i trajnimeve do të jetë integrimi evropian dhe përfaqësimi ndërkombëtar i Shqipërisë, me leksione nga ministrja Adea Pirdeni dhe ish-ministrja e Jashtme Olta Xhaçka.

Partia Socialiste synon që para shtatorit, kur nis sesioni i ri parlamentar, deputetët e rinj të jenë jo vetëm të përgatitur profesionalisht, por edhe të ndërgjegjshëm për përgjegjësinë e tyre ndaj partisë që po qeveris për të katërtin mandat radhazi. Me këtë strategji, PS përpiqet të minimizojë rrezikun e “amatorizmit parlamentar” dhe të konsolidojë një elitë të re politike që flet me zë të vet.