Ish-drejtori i Policisë së Lezhës, Henerigert Mitri, i cili ishte shpallur në kërkim nga SPAK për dosjen “Revanshi”, është vetëdorëzuar në Policinë e Tiranës. Mitri po hetohet për dyshime të rënda që lidhen me drejtime të organizuara kriminale, përfshirë kultivimin e kanabisit në zonën e Lezhës dhe organizimin e aktiviteteve të lojërave të fatit në kundërshtim me ligjin.

Gjykata e Posaçme e Shkallës së Parë për Korrupsionin dhe Krimin e Organizuar ka caktuar ndaj Mitrit masën e sigurisë “arrest në burg”, vendim i cili ishte marrë në mungesë të tij në maj të këtij viti. Përveç akuzave për kultivim të lëndëve narkotike, Mitri akuzohet për “grup të strukturuar kriminal”, “pjesëmarrje në grup të strukturuar kriminal”, “korrupsion pasiv”, “organizim të lojërave të fatit” dhe “shpërdorim të detyrës”.

Ky zhvillim vjen në kuadër të një hetimi të zgjeruar të SPAK për luftën kundër korrupsionit dhe krimit të organizuar në vend.