Ngjarja tragjike që tronditi Gjirokastrën më 20 prill, ku një 15-vjeçar me emrin Veip vendosi t’i japë fund jetës, ka marrë një dimension të ri pas rrëfimit të shokut të tij të ngushtë, i cili foli publikisht për herë të parë në emisionin Me Zemër të Hapur në News24, me gazetaren Evis Ahmeti.

Sipas rrëfimit, Veipi ishte një djalë i qeshur, i afërt me shokët dhe shumë social. Shoku i tij tregon se nuk kishte asnjë shenjë trishtimi apo sjellje që të ngjallte dyshime për gjendjen e tij mendore. “Ishte shoku im më i ngushtë. Kalonim çdo ditë bashkë, ishim në të njëjtën klasë dhe uleshim bashkë. Nuk ka pasur probleme ekonomike, familja e tij ishte në rregull,” tha ai.

Megjithatë, ai ndau detaje të dhimbshme për marrëdhënien e 15-vjeçarit me familjen, sidomos me të ëmën. Sipas tij, nëna nuk i kushtonte vëmendjen e duhur dhe e kishte denoncuar në polici pas një videoje që i ishte dërguar, në të cilën Veipi shfaqej duke bërë një shaka me një fëmijë më të vogël – një veprim që ajo e konsideroi të dhunshëm. Shoku i tij pretendon se ngjarja nuk kishte qenë aspak e tillë dhe se gjithçka ishte një lojë mes fëmijëve.

Një tjetër detaj shqetësues është edhe mungesa e kontaktit me të atin, me të cilin kishte marrëdhënie të mira, por nuk e takonte shpesh. “Ai e kishte paralajmëruar të ëmën që do të vetëvritej, por ajo, sipas asaj që më kanë thënë, u shpreh se ai po e bënte për vëmendje,” rrëfeu shoku.

Disa ditë para se të ndodhte ngjarja tragjike, Veipi kishte lënë një letër ku thuhej se do të shpjegonte arsyet e vendimit të tij, por askush nuk e kishte marrë seriozisht. Madje, kishte bërë edhe disa postime në TikTok mbi temën e vetëvrasjes, por ato u interpretuan nga shokët si shaka adoleshentësh.

Në përfundim të intervistës, shoku i të ndjerit theksoi:
“Mendoj se shkaku kryesor i vetëvrasjes është familja. Nëna nuk i ka dalë asnjëherë në krah.”

Kjo tragjedi ka ngritur sërish alarmin mbi nevojën për vëmendje dhe mbështetje emocionale për të miturit, si dhe rëndësinë e marrëdhënieve të shëndetshme brenda familjes. Autoritetet po vazhdojnë hetimet, ndërsa opinioni publik kërkon më shumë ndërgjegjësim për çështjet e shëndetit mendor tek të rinjtë.