Një incident i rëndë ka tronditur mëngjesin e kësaj të shtune median shqiptare, pasi forcat e policisë ndërhynë me dhunë në ambientet e “Focus Media News”, ku operojnë News24, BalkanWeb dhe Panorama.

Gazetari Armand Maho ka reaguar ashpër pas ngjarjes, duke e cilësuar atë si një precedent të rrezikshëm për lirinë e shtypit.

“Nën drejtimin e shefit të ‘KAYO’, Ardi Veliu, policia mësyu godinën e ‘Focus Media News’ dhe nxori me dhunë gazetarët jashtë”, shkruan Maho.

Ai shprehu keqardhje për kolegët e tij dhe akuzoi kryeministrin Edi Rama për një sulm të drejtpërdrejtë ndaj medias.

“Kjo është një goditje e madhe, madje edhe më e rëndë sesa goditjet e mëparshme që ky individ, që quhet Edi Rama, i ka dhënë medias në gjithë këtë kohë”, theksoi ai.

Maho gjithashtu ngriti akuza të forta mbi motivet e ndërhyrjes, duke përmendur informacione se godina e News24 mund t’i lihet në përdorim për ndërtimin e një fabrike armësh.

“Mora vesh që, në vend të News24, do të ndërtohet një fabrikë armësh, dhe nuk e kuptoj… sinqerisht nuk e kuptoj. Si nuk gjen një vend tjetër për t’ia dhënë Ardi Veliajt, atij shokut të Escobar-it? Po them saktë: këta janë si grup banditësh”, tha Maho.

Ngjarja ka ngritur shqetësime serioze mbi gjendjen e lirisë së medias në Shqipëri, ndërsa për momentin autoritetet nuk kanë dhënë asnjë sqarim zyrtar mbi ndërhyrjen.