Deputeti i Partisë Demokratike, Asllan Dogjani, u paraqit sot në Prokurorinë e Posaçme kundër Korrupsionit dhe Krimit të Organizuar (SPAK) për të dhënë dëshminë e tij në lidhje me një çështje që ka të bëjë me mosdeklarimin e pasurisë. Në fjalën e tij për mediat, Dogjani sqaroi se thirrja e tij lidhet me një pronë të përdorur si nevojtore për punonjësit, e cila më pas është rinovuar dhe rregulluar.

“Kjo është nevojtorja që gjoja banonte dikush dhe që u përdor si tualet për punonjësit. Kryebashkiaku Veliaj e shtoi dhe e bëri me pllaka, duke e kthyer në një pasuri publike. Pasi ndërtimi u përfundua, Kadastra anuloi legalizimin dhe vendosi kufizimin e pronës për 99 vjet. Sot paraqitem në SPAK për të denoncuar këtë korrupsion, ndërkohë që ai mashtruesi vazhdon ta përdorë pasurinë publike, përfshirë kopshtin dhe një pjesë të ndërtesës,” deklaroi Dogjani.

Dogjani tregoi se prona fillimisht i përkiste një pronari, i cili kishte lejuar Bashkinë ta përdorte si kopsht publik. Megjithatë, sipas tij, vendimet e mëvonshme të gjykatës kanë krijuar tension dhe borxhe.

“Vendimi i gjykatës detyron që njëri prej pronarëve t’i paguajë 100 mijë euro që nga ajo kohë. Një tjetër pronar është larguar nga shtëpia dhe tashmë banon me qira,” theksoi deputeti.

Duke vazhduar deklaratën e tij, Dogjani nënvizoi vështirësitë që po has për të gjetur zgjidhje për këtë çështje.

“Unë jam deputet dhe, pavarësisht kësaj, nuk mund të gjej zgjidhje sepse institucionet shtetërore nuk reagojnë. Në çdo vend tjetër, nëse një deputet denoncon një çështje të tillë, shteti do të reagonte menjëherë ose unë do të dënohesha për kallëzim të rremë,” përfundoi ai.

Deklarata e Dogjanit ngre shqetësime për transparencën dhe përgjegjësinë e institucioneve shtetërore në përballjen me korrupsionin dhe mbrojtjen e pasurive publike. Ndërkohë, mbetet për t’u parë se çfarë vendimi do të marrë SPAK në lidhje me hetimet për këtë çështje.