Një 32-vjeçar nga Tirana është arrestuar nga Policia e Shtetit për një seri vjedhjesh me dhunë të kryera përmes porosive online. I riu përdorte një metodë të veçantë: porosiste aparate celularë në adresën e tij dhe, sapo korrierët mbërrinin për dorëzim, i kërcënonte me thikë dhe i grabiste produktet pa paguar.

Operacioni i koduar “Porositësi” u zhvillua nga Komisariati i Policisë Nr. 4, pas hetimeve që zbuluan se i dyshuari ka kryer të paktën tre vjedhje të ngjashme më 15, 21 dhe 27 dhjetor 2024. Po ashtu, ai kishte thyer masën e sigurisë “Arrest në shtëpi” për një vepër të ngjashme penale të kryer më parë.

Gjatë arrestimit, policia sekuestroi një celular të vjedhur dhe një shumë parash si prova materiale. Materialet hetimore i janë dërguar Prokurorisë për procedurat e mëtejshme, ndërkohë që hetimet vijojnë për të zbuluar nëse 32-vjeçari është përfshirë në raste të tjera të ngjashme.