Policia e Sarandës ka finalizuar operacionin “Silent Watch”, pas dy muajsh hetimesh, duke arrestuar dy shtetase, Silvana Osmani (42 vjeçe) dhe Luljeta Deda (39 vjeçe), të dyja banuese në Sarandë, për shfrytëzimin e një vajze 16 vjeçare për prostitucion.

Operacioni u finalizua pas një hetimi të realizuar me metoda proaktive nga Seksioni për Hetimin e Trafiqeve, në bashkëpunim me Komisariatin e Policisë Sarandë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë. Hetimet kanë zgjatur rreth dy muaj dhe kanë çuar në identifikimin dhe arrestimin e dy shtetaseve, të cilat dyshohet se shfrytëzonin të miturën për prostitucion.

Gjatë kontrolleve në dy lokale të marra me qira nga të arrestuarat, të vendosura në lagjet nr. 3 dhe nr. 4 të Sarandës, ku dyshohet se ushtrohej prostitucioni, u gjet një shumë parash, e dyshuar se është përfituar nga ky aktivitet i paligjshëm. Kjo shumë parash u sekuestrua në cilësinë e provës materiale.

Materialet procedurale janë kaluar në Prokurorinë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.