Policia ka nisur hetimet për tre shtetas të mitur në tiranë, të cilët përmes mashtrimit në rrjete sociale përfituan një shumë prej 30 mijë eurosh.
Sipas njoftimit, tre të miturit hapnin llogari me të dhëna false në rrjete sociale dhe mashtronin qytetarë duke i premtuar favore seksuale.
Janë zbardhur dhe dokumentuar rreth 150 raste të kësaj skeme mashtrimi kompjuterik.
“Specialistët e Sektorit për Hetimin e Krimeve Kibernetike në DVP Tiranë, në vijim të punës për parandalimin e veprimtarive kriminale në fushën e krimeve kibernetike, gjatë monitorimeve të rrjeteve sociale dhe burimeve te hapura, kanë konstatuar llogari të ndryshme me të dhëna të dyshuara të falsifikuara.
Gjatë monitorimeve të këtyre llogarive janë konstatuar publikime të ndryshme në të cilat premtoheshin favore seksuale kundrejt pagesave të ndryshme monetare, dhe menjëherë është organizuar puna për vënien para përgjegjësisë ligjore të personave përgjegjës, të kësaj skeme mashtrimi kompjuterik.”
“Kush është për takim nesër DM”, “kush është për takim tani në Tiranë”, “Kë kam për takim për të ndenjtur gjithë natën, çmimi 200 euro, rezervoni shpejt”, “Kush është për takime tek apartamenti im, kaloni në DM”, këto janë disa nga Instastoryt e postuara në llogaritë e krijuara me të dhëna false.
Pas një pune të mirëorganizuar u finalizua operacioni policor i koduar “Takimi”, në kuadër të cilit u identifikuan dhe proceduan penalisht tre shtetas të mitur të moshave 16 dhe 17 vjeç.
Tre autorët, krijonin llogari me të dhëna të falsifikuara të shtetaseve të ndryshme, dhe me anë të postimeve në këto profile, premtoheshin favore seksuale kundrejt pagesave të ndryshme. Administratorët e këtyre profileve, kërkonin nga të interesuarit që pagesa të kryhej në disa vendndodhje të përcaktuara prej tyre, i merrnin paratë pasi i orientonin të interesuarit për vendet ku duhej të lihej pagesa dhe më pas largoheshin duke i bllokuar personat në llogaritë e tyre, në rrjetet sociale ku komunikonin.
DVP Tiranë fton qytetarët që nqs do të konstatojnë profile të tilla nëpër rrjete sociale, të paraqiten në Sektorin për Hetimin e Krimeve Kibernetike, në DVP Tiranë.
