Një tjetër shpërthim i fuqishëm ka tronditur kryeqytetin iranian mbrëmjen e djeshme, këtë herë në veri të Teheranit, duke sjellë mbylljen e pjesshme të Rrugës Valiasr, një nga arteriet më të rëndësishme që përshkon qytetin nga veriu në jug.

Ky shpërthim i fundit vjen në vazhdën e disa shpërthimeve të tjera që janë dëgjuar më herët në lagjet lindore të qytetit, duke shtuar ndjeshëm tensionin dhe ndjenjën e pasigurisë mes popullatës.

Pamjet nga vendngjarja, të shpërndara në rrjetet sociale dhe media lokale, tregojnë shtëllunga të dendura tymi të zi që ngrihen mbi lagjet përreth, ndërsa alarmet dëgjohen në sfond dhe banorët shihen duke braktisur zonën me nxitim.

Deri më tani, autoritetet iraniane nuk kanë dhënë një deklaratë zyrtare mbi shkaqet apo pasojat e mundshme të këtyre shpërthimeve. Mungesa e informacionit zyrtar ka nxitur spekulime në opinionin publik dhe ankth për një përshkallëzim të mëtejshëm të situatës së sigurisë në vend.

Ngjarja vjen në një moment tensioni të lartë gjeopolitik, me rritje të incidentëve dhe sulmeve të dyshuara brenda territorit iranian, duke ngritur pyetje mbi sigurinë kombëtare dhe reaksionin e mundshëm të autoriteteve në ditët në vijim.