Banorët e Libanit janë tronditur nga sulmi i fundit ajror i Izraelit, i cili shkaktoi 12 viktima dhe disa të plagosur. Ky sulm goditi qendrën e mbrojtjes civile pranë qytetit Baalbek dhe Tayouneh, në Libanin Lindor. Sipas raportimeve të mbrojtjes civile libaneze, të cituara nga Al Jazeera, mes viktimave ndodheshin edhe pesë punonjës të shëndetësisë. Menjëherë pas sulmit, Izraeli lëshoi urdhrin për evakuimin e detyrueshëm të banorëve, duke krijuar panik dhe turmë njerëzish që u mblodhën në vendngjarje.

Gjatë kësaj jave, Izraeli ka intensifikuar sulmet ajrore kundër zonave jugore të Bejrutit, të cilat kontrollohen nga Hezbollahu, duke përshkallëzuar tensionet në një kohë kur Shtetet e Bashkuara po kryejnë nismë diplomatike për të ndihmuar në ndalimin e konfliktit. Sipas mediave amerikane si Wall Street Journal, ish-Presidenti Donald Trump ka miratuar një plan propozimi për një armëpushim në Liban. Ministri izraelit i Çështjeve Strategjike, Ron Dermer, në një takim në rezidencën e Trump në Mar-a-Lago, njoftoi detajet e këtij plani.

Plani i konsultuar nga Wall Street Journal parashikon tërheqjen e trupave dhe armëve të Hezbollahut nga kufiri verior i Izraelit, përtej lumit Litani. Ushtria libaneze dhe forcat paqeruajtëse të OKB-së do të marrin përsipër mbikëqyrjen e kësaj zone për të siguruar që militantët e Hezbollahut të mos rikthehen.

Ndërkohë, Ambasadori amerikan në Liban ka paraqitur një projekt-propozim armëpushimi kryetarit të parlamentit libanez, Nabih Berri, i cili mbështetet nga Hezbollahu, për të negociuar. Dy burime të larta politike libaneze, të cituara nga Reuters, thanë se drafti ishte propozimi i parë me shkrim nga Uashingtoni për të ndalur luftimet midis Izraelit dhe Hezbollahut të mbështetur nga Irani. Një diplomat i lartë, që foli në kushte anonimiteti, vlerësoi se duhej më shumë kohë për të arritur një armëpushim, por shprehu shpresën se një zgjidhje mund të ishte e mundur.