Arban Domi, mjek virolog nga Atlanta në SHBA u shpreh se nuk ishte imagjinuar ky sukses kaq i madh i vaksinave.
Si drejtor i projektit të vaksinave Geovax, ai foli për suksesin e vaksinave të Pfizer dhe Moderna.
“Vaksinat janë të pranueshme kur kanë efikasitet mbi 80 përqind. Suksesi mbi 90 përqind ishte e paimagjinueshme kur nisi përgatitja e vaksinës,” tha ai.
“Megjithatë duhet të jemi akoma të kujdesshëm te kohëzgjatja e imunitetit. Teorikisht, mbrojtja duhet të jetë në nivele të larta,” tha ai.
Duke folur për projektin Geovax, ai tha se “ne kemi katër kandidatë për vaksina. Dy prej tyre kanë prodhuar efikasitet 100 përqind te kafshët e vogla. Në fund do merret më i miri nga katër kandidatët për të kaluar te testet klinike të njerëzit”.
Sa u përket vaksinave nga Kina dhe Rusia, ai tha: “Kam rezervat e mia për vaksinat e Kinës dhe Rusisë. Gjithçka lidhet me transparencën”.
Domi tha se vaksinimi i plotë nuk mund të arrihet deri në fund të vitit që vjen. Sipas tij, edhe në vende si SHBA nuk do të arrihet vaksinim i plotë deri në fund të vitit 2021.
