Virusi i ri Nipah, i identifikuar në janar në Indi, ka si burim lakuriqët e natës dhe renditet ndër 10 viruset më të rrezikshme në botë për shkak të vdekshmërisë së lartë. Megjithatë, autoritetet shëndetësore në vendin tonë theksojnë se rreziku i përhapjes në Shqipëri është shumë i ulët.

Shefja e Departamentit të Sëmundjeve Infektive në Institutin e Shëndetit Publik, Silva Bino, sqaroi se virusi përhapet përmes sekrecioneve të lakuriqëve të natës, konsumit të hurmave të palmës të kontaminuara, kontaktit me kafshët shtëpiake të infektuara, si dhe nga njeriu te njeriu përmes kontaktit të ngushtë dhe spërklave.

Sipas saj, infeksioni shkakton forma shumë të rënda sëmundjeje, me një shkallë vdekshmërie që mund të arrijë deri në 75% të rasteve. Simptomat fillestare përfshijnë temperaturë të lartë dhe vështirësi në frymëmarrje, ndërsa në raste të rënda mund të shfaqet encefalit akut, apo edhe prekje e trurit që manifestohet muaj apo deri në një vit pas kalimit të sëmundjes.

Bino thekson se rreziku mbetet i ulët për sa kohë virusi nuk përhapet nëpërmjet ajrit, por kujdes i veçantë duhet të tregojnë personat që udhëtojnë në vende ku janë evidentuar raste, si India, Bangladeshi apo Singapori. Për këta udhëtarë rekomandohet marrja e këshillave paraprake shëndetësore dhe shmangia e kontakteve të rrezikshme.

Autoritetet shëndetësore sigurojnë se nuk ka vend për panik, duke nënvizuar se situata po monitorohet dhe se rreziku për popullatën shqiptare konsiderohet aktualisht minimal.