Viti i ri ka nisur me lëkundje të lehta tërmeti në veri të Shqipërisë, duke sjellë shqetësim tek banorët e zonës.

Sipas të dhënave zyrtare, tërmeti është regjistruar pak pas mesnate, 8 km në verilindje të Kukësit, pranë kufirit me Prizrenin. Epiqendra ka qenë ndërmjet kufirit të Shqipërisë dhe Kosovës.

Lëkundjet kanë qenë me magnitudë 3.4 të shkallës Rihter dhe me një thellësi prej 5 km.

Fatmirësisht, nuk raportohet për dëme materiale apo persona të lënduar, ndërsa autoritetet vijojnë monitorimin e situatës. Banorët e zonës kanë ndier lëkundjet, por pa pasoja të tjera të rëndësishme.

Ekspertët bëjnë thirrje për qetësi dhe kujdes, ndërsa theksojnë se lëkundje të tilla janë të zakonshme për këtë rajon të njohur për aktivitet sizmik.