Një ngjarje e rëndë ka tronditur qytetin e Vlorës në orët e para të mëngjesit të sotëm, ku një i mitur ka humbur jetën pas një aksidenti fatal.

Sipas të dhënave paraprake, ngjarja ka ndodhur rreth orës 01:30, kur Leandro Shametaj, 17 vjeç, po udhëtonte me një automjet të tipit Porsche. Ende nuk dihen me saktësi rrethanat që çuan në aksidentin tragjik, ndërsa policia po punon për të zbardhur shkaqet.

Në vendngjarje kanë mbërritur forcat e policisë dhe grupi hetimor, të cilët po analizojnë nëse ngjarja lidhet me shpejtësinë, humbjen e kontrollit apo faktorë të tjerë.

Trupi i pajetë i të riut ndodhet në spitalin e Vlorës, ku janë mbledhur familjarë dhe të afërm të viktimës. Ata kanë kërkuar dorëzimin e trupit, por procedurat zyrtare janë pezulluar për shkak të mungesës së mjekut ligjor, i cili — sipas burimeve — nuk ka mbërritur në spital edhe pse është njoftuar prej më shumë se 7 orësh.

Autoritetet po vijojnë hetimet për të sqaruar plotësisht dinamikën dhe përgjegjësitë e mundshme të aksidentit tragjik që i mori jetën 17-vjeçarit.