Policia e Tiranës ka finalizuar me sukses operacionin policor të koduar “Saga”, duke vënë në pranga një 37-vjeçar të dyshuar për disa raste vjedhjesh me thyerje në kryeqytet.
I arrestuari është Ndriçim Koka, 37 vjeç, banues në Tiranë, i cili rezulton se ka qenë i dënuar më parë në Greqi për vjedhje.
Detajet e hetimit
Sipas Policisë së Shtetit, hetimet zbuluan se më 8 nëntor 2025, Koka kishte vjedhur 12 milionë lekë në një banesë në rrugën “Artan Lenja”, ndërsa më 19 tetor 2025 kishte thyer një kioskë në rrugën “Muhamet Gjollesha”, prej nga kishte marrë produkte me vlerë rreth 50 mijë lekë.
“Pas hetimeve intensive dhe analizës së provave filmike e biologjike, u identifikua dhe u arrestua 37-vjeçari, i cili fshihej në Tiranë,” thuhet në njoftimin zyrtar të Policisë.
Gjatë kontrollit në banesën e tij, u gjetën dhe u sekuestruan një sasi lënde narkotike (Cannabis Sativa), veshjet që kishte përdorur gjatë vjedhjeve dhe sendi i fortë që shërbente për thyerjen e dyerve dhe kasave.
Hetimet vijojnë
Policia po verifikon nëse i arrestuari është i përfshirë edhe në raste të tjera vjedhjesh të ngjashme në Tiranë dhe qytete të tjera.
Materialet hetimore i janë referuar Prokurorisë së Tiranës, ndërsa 37-vjeçari do të përballet me akuzat për “vjedhje me thyerje” dhe “prodhim e mbajtje të lëndëve narkotike”.
