Albana Vokshi, kryetarja e Komisionit Hetimor për koncesionet në Shëndetësi, në një deklaratë për mediat, hodhi akuza ndaj Partisë Socialiste për tentativën e tyre për të bllokuar punën e komisionit. Ajo shprehu shqetësimin pas mungesës së deputetëve socialistë për herë të tretë në mbledhje. Vokshi theksoi se do të dërgohet një letër Lindita Nikollës, kryetare e Kuvendit, për të kërkuar masa për të siguruar vazhdimin e punës së komisionit, duke përfshirë largimin e anëtarëve socialistë nëse ata mungojnë përsëri.

“Ato kanë ngritur komisionin për ta dështuar, për ta bllokuar. Çdo mbledhje bojkotohet nga mazhoranca sepse nuk dëshirojnë që të zbardhen aferat korruptive kriminale në Shqipëri, siç janë rastet e check-up dhe sterilizimit. 7 deputetë të opozitës me firma kanë thirrur mbledhjen e Komisionit. Prania e deputetëve të mazhorancës sot është e detyrueshme, nuk zgjedhin, kjo e rregullon ligji”, tha Vokshi.

Ajo gjithashtu bëri të ditur se për shkak të mungesës së deputetëve socialistë, janë dërguar mbi 40 kërkesa për të mos penguar punën e komisionit.

Gazment Bardhi, një prej përfaqësuesve të opozitës, do të dërgojë një letër tek kryetarja e Kuvendit për të marrë masa, duke synuar që të vazhdojnë hetimet parlamentare dhe të informojnë komunitetin ndërkombëtar për këto parregullsi.

Vokshi mohoi pretendimet për heqjen dorë nga dy koncesionet e tjera në shëndetësi, duke thënë se ata vazhdojnë punën për hetim parlamentar. Ajo gjithashtu hodhi dyshime për veprimtarinë e Ilir Beqaj në marrjen e një tenderi të ri, megjithëse ai është në hetim nga SPAK.

“Në 4 muaj është e pamundur të hetojmë 4 koncesione. Do hetohen edhe ato, nuk kemi hequr dorë”, shtoi Vokshi.