Partia Demokratike ka mbledhur sot Kryesinë teksa ka mbajtur fjalën kreu i demokratëve Sali Berisha.

Në fjalën e tij Berisha tha se PD përfundoi me sukses procesin e primareve teksa shtoi se në garë ishin më shumë se 200 kandidatura teksa 55 mijë anëtarë dhe simpatizantë morën pjesë në votim.

Berisha:

Kjo mbledhje është thirrur në një moment shumë të rëndësishëm, si në rrafshin elektoral edhe politik. Përfunduan me sukses përveç se në dy degë, zgjedhjet e kandidatëve për qytetarë të parë të bashkive të vendit. Ky ishte një proces i cili zhvillohej për herë të parë me këtë proporcion, transparencë dhe pjesëmarrje. PD në përputhje me përcaktimet e statutit të rithemelimit të saj të 11 dhjetorit, bëri realitet premtimin e saj dhe sanksionimin e këtij premtimi, se pushtetarët vendorë dhe ata qendror, deputetët do të zgjidhen me votën e anëtarësisë së saj dhe simpatizantëve të saj.

Në garë pati mbi 200 kandidatura, në tërësi veprimtarë të shquar dhe të vendosur të PD-së, por në garë morën pjesë edhe veprimtarë të shquar të shoqërisë civile dhe shqiptarët të shquar në emigracion. Në këtë garë, e para me këto standarde në historinë e vendit, votuan për qytetarët e parë të bashkive, rreth 55 mijë anëtarë dhe simpatizantë të PD. Kurrë ndonjëherë në këtë parti kaq vota nuk janë hedhur. Ky votim tejkaloi të paktën me 15 % të gjitha votimet e tjera.

Ky është një rast për të falënderuar të gjithë kandidatet dhe kandidatët që garuan, për të shprehur një mirënjohje të thellë të gjithë atyre që organizuan fushatën e tyre, të gjithë anëtarëve e simpatizantëve që morën pjesë në votim.

Procesi ka pasur në tërësi konkurrencë të ndershem. Në një rast komisioni ndërhyri për të mbajtur qëndrimet e duhura por një rast nuk mund të çalojë. Në këtë garë ka patur diferenca në vota midis kandidatëve por kanë qenë edhe të ngushta në një votë.