Autoritetet në Elbasan kanë dhënë detaje mbi konfliktin që çoi në vrasjen e biznesmenit Edmond Mondi Mëhalla, duke vendosur në qendër të hetimeve 35-vjeçarin Oklid El Ouejdi, i njohur në qytet me nofkën Kiço ose Oliver dhe nip i personazhit të njohur Timit të Elbasanit. Ai dyshohet se ka organizuar dhe financuar atentatin ndaj Mëhallës.
Sipas Policisë së Shtetit, konflikti ka nisur nga një marrëveshje tregtare e papërfunduar me vlerë 700 mijë euro. Rreth 10 ditë para vrasjes, Mëhalla kishte ushtruar dhunë fizike ndaj Ouejdit në karburantin Xhaxhi Oil. Për të shmangur detyrimin financiar, Ouejdi kishte ofruar si kompensim katër apartamente në Tiranë, por me probleme pronësie, gjë që rriti tensionet mes tyre.
Më 10 ditë pas përplasjes fizike, Mondi Mëhalla u qëllua me tre plumba dhe u vra profesionalisht, ndërsa autorët dogjën makinën tip Audi pas krimit. Mëhalla, i njohur në qytet si Hyka, ishte mik i ngushtë i Kei Piut.
Deri tani janë arrestuar tre persona:
• Nevzat Nevi Spaho, i dyshuar si shoferi që ndihmoi autorin të largohej;
• Kujtim Pisha, punonjës karburanti, akuzuar për mosparaqitje të informacionit;
• Xhino Ago, ortak i Mëhallës, i akuzuar për mosndryshimin e pronësisë së makinës së përdorur në krim.
Në kërkim mbeten Armando Kola nga Laçi dhe Marselo Arani nga Elbasani, i cili kishte thyer masën e arrest shtëpie për pastrim parash. Figura kyçe mbetet edhe Naldi Gjini, i cili ka identifikuar disa prej të dyshuarve dhe ka ndihmuar hetimet.
Autoritetet e konsiderojnë Oklid El Ouejdi personin kyç në hetim, me qëndrim të dyshuar në Maqedoninë e Veriut dhe lidhje të shumta në rajon, përfshirë edhe me Sheval Muharremin, i njohur si Bosi i Gërçecit. Hetimet tregojnë se konflikti financiar dhe tensionet personale çuan situatën deri te atentati.
Policia vijon përpjekjet për kapjen e Ouejdit dhe dy të kërkuarve të tjerë, ndërsa hetimet pritet të sjellin zhvillime të rëndësishme në ditët e ardhshme.
