Mediet italiane kanë zbuluar dëshmi të reja lidhur me vrasjen e 22-vjeçares Ilaria Sula, që u ekzekutua me thikë nga i dashuri i saj. Në një zhvillim të ri të hetimeve, nëna e autorit ka dhënë një dëshmi shokante gjatë marrjes në pyetje nga prokuroria, duke zbuluar momentet e frikshme pas ngjarjes.

Ajo ka treguar se kur ka shkuar në shtëpi, ka parë djalin e saj të tmerruar, me fytyrën të kuqe dhe të dridhur. “Më tha: ‘Nuk kam fjetur, nuk kam ngrënë…’ si i pushtuar nga një demon. U frikësova se mos më bënte keq edhe mua”, ka treguar nëna, duke shprehur frikën për jetën e saj.

“I thashë: ‘Çfarë bëre, bir?’ Ai m’u përgjigj në filipinase: ‘Nëse nuk e bëja unë, më vrisnin mua’, sikur të donte të thoshte se në vend të saj do të vdiste ai”, rrëfeu ajo.

Prokuroria e Romës ka zbuluar gjithashtu se gruaja ka luajtur një rol në fshehjen e trupit të viktimës. Pas krimit, trupi i Ilaria Sulës u fut në një valixhe dhe u hodh në një greminë në Capranica Prenestina, rreth 40 kilometra nga Roma.

Autoritetet kanë vazhduar hetimet dhe janë duke shqyrtuar rolin e mëtejshëm të nënës së autorit, e cila është nën hetim për bashkëpunim në pastrimin e skenës së krimit dhe fshehjen e trupit.

Ky rast ka tronditur opinionin publik italian, ndërsa hetimet vazhdojnë për të zbardhur plotësisht ngjarjen dhe për të zbuluar arsyet e krimit të rëndë.