Një grup studiuesish nga Qendra Onkologjike e Universitetit Shtetëror të Ohajos ka identifikuar një enzimë të re që mund të përdoret si armë potenciale për të luftuar glioblastomën, formën më agresive dhe vdekjeprurëse të tumorit në tru. Ky zbulim është bërë publik në revistën shkencore “Science Advances”.

Glioblastoma, një tumor që zhvillohet me shpejtësi nga qelizat gliale të trurit, prek rreth 15 mijë persona çdo vit dhe është një nga tumoret më të vështira për t’u trajtuar. Huali Su, autori kryesor i studimit, thekson se glioblastoma ka një mbijetesë mesatare prej vetëm 12-16 muajsh pas diagnostikimit, pavarësisht trajtimeve aktuale.

Studimi ka identifikuar enzimen “Pgm3” si një komponent kyç në procesin që ndihmon tumorin të rritet. Kjo enzimë është përfshirë në prodhimin e një molekule që bashkon sheqernat me proteinat dhe yndyrnat, duke ofruar energji për tumorin dhe mundësi për të u përhapur më shpejt.

Sipas Deliang Guo, koordinatori i studimit, “Bllokimi i kësaj enzime mund të ndërpresë lidhjen mes sheqernave, proteinave dhe yndyrnave brenda qelizave, duke ndaluar rritjen e tumorit”. Ky zbulim mund të hapë rrugën për zhvillimin e trajtimeve të reja për glioblastomën, një lëmë që ende ka opsione të kufizuara për trajtim.