Dy shtetas britanikë janë dënuar me burgim të përjetshëm nga drejtësia angleze, pasi u shpallën fajtorë për një grabitje të dhunshme që përfundoi me vrasjen e 26-vjeçarit shqiptar, Indrit Mustafaj.

Sipas mediave britanike, mes tyre edhe BBC, Michael Mulvana, 32 vjeç, dhe Jobie Tyers, 28 vjeç, të dy nga Jorku, hynë me forcë në një apartament ku ndodhej një grua dhe Indrit Mustafaj. Gjatë sulmit, autorët plagosën rëndë gruan, ndërsa shqiptari tentoi të fshihej në një cep të dhomës për t’i shpëtuar agresionit.

Megjithatë, dy të pandehurit e sulmuan atë me hanxhar, duke i shkaktuar plagë fatale. Indrit Mustafaj humbi jetën në vend si pasojë e dhunës ekstreme të ushtruar ndaj tij.

Gjykata i cilësoi veprimet e autorëve si jashtëzakonisht të rënda dhe të paramenduara, duke vendosur ndaj tyre dënimin maksimal – burgim të përjetshëm. Vendimi u përshëndet nga familjarët e viktimës, ndërsa autoritetet theksuan se drejtësia ka dhënë një mesazh të fortë kundër krimeve të dhunshme.