Tre persona janë arrestuar nga policia greke për vrasjen e 41-vjeçarit shqiptar Altin Arapaj, ngjarje e ndodhur në një vresht në zonën e Rafinas, në Greqi. Figura qendrore e hetimit është 46-vjeçari Mikel Selimaj, ndërsa dy të tjerët janë ndaluar për bashkëpunim të mundshëm në krim, pasi dyshohet se e shoqëruan autorin në vendin e ngjarjes.

Sipas mediave greke, autoritetet kanë sekuestruar armën e krimit dhe po hetojnë rrethanat që çuan në vrasjen tragjike.

Avokati i Selimajt, Nikos Roussopoulos, ka deklaruar për “Developments Now” se viktima dhe klienti i tij njiheshin prej vitesh dhe kishin pasur një marrëdhënie miqësore. Ai theksoi se në momentin e ngjarjes, të dy ndodheshin nën ndikimin e kokainës.

“Ata kishin konsumuar një sasi të madhe kokaine. Ne kemi kërkuar analiza të gjakut dhe urinës për të vërtetuar këtë fakt. Arma i përkiste viktimës,” u shpreh avokati.

Ai pretendoi se vrasja nuk ishte e qëllimshme, por ndodhi aksidentalisht në përpjekje për të çarmatosur viktimën. “Ndërsa klienti im po përpiqej ta çarmatoste, arma u shkrep. Plumbi përfundoi në faqe. Nëse dikush ka qëllim të vrasë, nuk synon fytyrën, por kokën ose gjoksin,” argumentoi Roussopoulos.

Sipas tij, nuk ka pasur asnjë konflikt të mëparshëm mes tyre, ndërsa mohoi çdo përfshirje të klientit të tij në ndonjë mosmarrëveshje pronësore. “Bëhet fjalë për një pronë për të cilën viktima kishte konflikt me një shtetas kanadez. Klienti im nuk ka lidhje me këtë çështje,” përfundoi ai.

Hetimet për zbardhjen e plotë të ngjarjes vijojnë.