Një ngjarje e rëndë ka tronditur mëngjesin e sotëm qytetin e Athinës, ku një 42-vjeçar është ekzekutuar me armë zjarri nga persona ende të paidentifikuar.

Sipas raportimeve nga policia greke, ngjarja ndodhi në rrugën Skipi të lagjes Kalithea, teksa viktima ishte duke parkuar automjetin e tij. Në ato momente, ai u qëllua me disa plumba nga autorët, dy prej të cilëve e goditën në trup duke i shkaktuar vdekjen e menjëhershme.

Trupi i pajetë u gjet nga banorët e zonës në orët e para të mëngjesit, të cilët njoftuan menjëherë policinë.

Burime nga hetimi bëjnë me dije se viktima kishte precedentë penalë të mëparshëm, veçanërisht të lidhur me trafikun e drogës. Për këtë arsye, pista kryesore e hetimeve është ajo e një larjeje hesapesh mes bandave kriminale.

Policia greke ka nisur një operacion për identifikimin dhe kapjen e autorëve, ndërsa pritet që pamjet e kamerave të sigurisë të ndihmojnë në zbardhjen e ngjarjes.